A pandemia deixou un forte golpe económico no tecido local que aínda está a deixar sentir os seus ecos coas importantes restricións vixentes durante todo este mes na actividade. o comercio local é un dos sectores que ten enfrontado a actual crise cunha actitude esforzada por seguir a ofrecer o mellor servizo e manter a flote os seus negocios.
A Xuntanza de Empresarios de Ames reaccionou a esta situación apostando fortemente polo Black Friday. Ata o 18 de novembro ofrece á veciñanza a posibilidade de gañar importantes premios baixo a forma de vales de consumo nas tendas locais. As persoas gañadoras daranse a coñecer o mércores 18 de novembro en Ames Radio.
A XEA reparte ata 840 euros nesta serie de premios. Haberá un cheque de 250 euros, outro de 150 e un terceiro de 100. Ademais repartiranse ata 17 de 20 euros. Todos estes cheques serven para ser canxeados no comercio local durante a campaña do Black Friday, os días 27, 27, 28 e 29 de novembro.
A carón da hostalería
Un bo número de empresas asociadas á XEA non quixeron deixar pasar a oportunidade de apoiar ao sector hosteleiro local ofrecendo importantes descontos aos compradores se presentan tickets de hostalería nos seus establecementos. Os descontos van do 10% ao 20% segundo o establecemento. A iniciativa orixinal, lanzada o pasado día 6, foi da tenda Núa Moda e Complementos.
