Pasado día 20 celebrouse no Pabillón do Milladoiro a VII InnovAmes, baixo o lema “A revolución invisible; innovación que cambia o día a día”.
O obxectivo de InnovAmes é achegar a toda a cidadanía as últimas tendencias no mundo da innovación, tecnoloxía ou o audiovisual da man das empresas do concello de Ames, xerando un espazo para a aprendizaxe e o diálogo, onde se comparten coñecementos e sinerxías para crear proxectos innovadores. Ao longo de toda a xornada houbo diferentes charlas, mesas de debate, obradoiros, presentación de proxectos innovadores e ofreceuse información nos stands permanentes por parte das empresas, universidades e centros de ensino participantes.
Ao evento asistiron as empresas amesás Conic vascular – CAST, Ficción Producciones, Nanogap, Sinerxia, Cartogalicia, Impulsadixital, Werobots, Codery, Karbonius, Casalonga forestal y jardín, Emotionallight, Silvereira, Artesanía Tuñas, Bahiasoftware, Nortigalia, Placein, Biostatech, Catec, Clun, Stampa, Iluminaciones Santiaguesas, Gst, Ojoalvatio, Augas de Ames, H2GZ, DOOIGNIT, e Elora.
E este ano, como novidade, tamén acudiron ao evento como convidadas empresas doutros concellos próximos a Ames: Adoc Vimbio e Cloud.gal, de Santiago de Compostela; Farmasecurity, de Vigo; Metalia Consultores, das Pontes; Obit Dynamics, de Ribeira; Disal, de Vilagarcía de Arousa e Powernet, da Coruña. Estes dous últimos concellos, do mesmo xeito que Ames, forman parte da Rede Innpulso.
Relatorios de interese en materia científica
Durante a xornada sucedéronse diversos relatorios de interese en materia científica. A primeira mesa tratou sobre “Por que as innovacións que máis transforman a nosa vida adoitan ser as menos visibles? É necesario que a innovación sexa disruptiva e visible para ser realmente transformadora?”. Contou coa participación da Secretaría Xeral de Innovación, Teresa Riesgo; Emilio Martínez, representante da Universidade de Santiago de Compostela; Nerea Dávila, representante de Nanogap e Eugenio Varela, representante de Access Surgical Technologies.
Na segunda mesa falouse de “Tecnoloxía con propósito: innovar sen perder ás persoas”. Participaron o Delegado Especial do Consorcio da Zona Franca de Vigo, David Regades; Isabel Martínez, subdirectora adxunta de Política e Estratexia Aeroespacial; Xanel Vecino, da Escola de Enxeñería Industrial da UVigo; Alicia Cano, do CATEC e Esther Saavedra, de NTT DATA.
Ademais, houbo unha actividade para os máis cativos, chamada “Maxia e tecnoloxía”; e a Cadena Ser fixo un programa especial do Hoy por Hoy Santiago.
Premios educativos
Os premios buscan poñer en valor o traballo e a dedicación dos escolares amesáns en materia científica e de innovación. Nesta edición, a participación dividiuse entre o CEIP Agro do Muíño e o CEIP de Barouta.
O primeiro premio, dotado de 1.700€, foi para os rapaces e rapazas de Barouta, co seu traballo “Ponlle voz”. En segunda posición, cun premio de 1.500€, a aula de 5ºC de Agro do Muíño, con “Os planetas”. Pechou o podio o traballo “Receitas musicais”, do CEIP de Barouta, que levou unha un premio de 1.200€. E en cuarta posición “Un cerebro artificial”, dos rapaces e rapazas de 6ºB do CEIP Agro do Muíño, os cales recibiron 900€.
Premios aos proxectos empresariais
Os premios InnovAmes para empresas innovadoras teñen como obxectivo recoñecer e poñer en valor o esforzo de persoas emprendedoras e das empresas cun maior grao de innovación e potencial de crecemento en Ames. Para outorgar ditos premios valóranse aspectos como o compoñente de innovación, a sostibilidade, o uso de novas tecnoloxías, a globalización do proxecto, o potencial impacto do mesmo na contorna de Ames e a propia presentación no InnovAmes.
Deste xeito, as empresas premiadas foron Iluminaciones Santiaguesas, que levou o premio ao impacto innovador polo proxecto Bridalab; e a empresa Elora, que foi galardoada co premio á innovación empresarial polo proxecto Elora Smart.
Presenza Institucional
O InnovAmes 2026 foi clausurado polo alcalde de Ames, Blas García; a concelleira de Promoción Económica e Emprego, Ana Belén Paz; a secretaria do Ministerio de Ciencia, Innovación e Universidades, Teresa Riesgo; e o delegado especial da Zona Franca de Vigo, David Regades. Ademais, contouse coa actuación musical de Kike Varela e Puga.
O alcalde de Ames, Blas García, puxo de manifesto “o gran traballo que se fai no noso concello. Moitas persoas non saben que dende o parque empresarial do Milladoiro axúdase a deseñar barcos que acaban gañando a Copa América de vela, por exemplo”. Non obstante, para Blas García, o máis importante do InnovAmes “é ter connosco a todos estes nenos e nenas que veñen con moita ilusión a ensinar os seus proxectos. O futuro constrúese dende o presente, en actos coma este”.
A concelleira de Promoción Económica e Emprego, Ana Belén Paz, sinalou a aposta “por un modelo de concello innovador, que aposta decididamente por converterse nun polo de atracción para proxectos e empresas que queiran desenvolver a súa actividade no municipio amesán”.
A secretaria xeral de Innovación do Ministerio de Ciencia, Innovación e Universidades, Teresa Riesgo, destacou que o InnovAmes “é algo moi importante, porque nestes espazos é onde se ven as cousas que intentamos cambiar”.
A deputada de Emprego e Industria, Rosa Ana García engadiu que “este evento representa perfectamente o modelo de desenvolvemento que estamos traballando dende a Deputación da Coruña, baseado no coñecemento, na cooperación e na xeración de oportunidades no noso territorio. InnovAmes é moito máis que unha feira ou que unha cita técnica; é un espazo de conexión”.
Por último, o delegado do Goberno en Galicia, Pedro Blanco, sinalou o bo facer do Concello de Ames, pola “capacidade para atraer talento, para xerar oportunidades e para crear un ecosistema de empresas, centros educativos e administracións onde todos colaboramos” para facer futuro.