A Concellaría de Obras e Servizos Básicos prepárase para licitar o servizo de desbroce, limpeza e mantemento dos núcleos rurais amesáns. A través deste servizo, parte do PLAMRURAL AMES, preténdese realizar os traballos de limpeza, mantemento e conservación dos accesos e interiores dos núcleos rurais. Tamén se realizarán tarefas de mantemento dos contornos de lavadoiros, igrexas, locais sociais, muíños, beirarrúas e canalizacións de pluviais de titularidade municipal. Actuarase nas 11 parroquias do concello de Ames e nun total de 107 núcleos rurais.
Os traballos de limpeza e mantemento dos accesos e interiores dos núcleos rurais executaranse en Agrón (14 núcleos); na Ameixenda (8 núcleos); Ames (18 núcleos); Biduído (13 núcleos); Bugallido (11 núcleos); Covas (8 núcleos); Lens (2 núcleos); Ortoño (15 núcleos); Piñeiro (6 núcleos); Tapia (3 núcleos); e Trasmonte (9 núcleos).
Ao Concello correspóndenlle as operacións de conservación e mantemento dos viarios de acceso e interiores dos núcleos rurais. A empresa adxudicataria do servizo terá que presentarlle un plan coa totalidade dos traballos a desenvolver. Dita planificación será completa e estará libre de incompatibilidades internas e externas. O Concello de Ames poderá introducir modificacións no plan, con relación ao alcance, secuencia e ordenación de operacións que permitan mellorar a calidade dos traballos conseguidos sempre e cando, non excedan do alcance orzamentario previsto para a execución do traballo.
Equipo mínimo de tres persoas
Deberase contar cun equipo mínimo de tres persoas traballando simultaneamente, debendo prevalecer a paridade entre o equipo de traballo.
O concelleiro de Obras e Servizos Básicos, Blas García, explica que “este é un avance máis deste Goberno municipal pola aposta do rural amesán, e en concreto, unha aposta seria e firme pola conservación dos nosos núcleos rurais”.