A declaración do estado de alarma por parte do Goberno central e as medidas de confinamento no fogar teñen alterado moitos calendarios de eventos e prazos públicos. O pagamento de servizos e tributos en Ames é un deles. O Concello aprobou onte un decreto que recolle unha serie de modificacións tributarias.
O período voluntario de ingreso das liquidacións tributarias e de ingresos de dereito público municipais e xa notificadas, con vencemento o 20 de marzo, o 5 de abril, ou o 20 de abril, amplíase ata o 30 de abril deste ano. Ata a mesma data queda ampliado o período voluntario de ingreso de diferentes taxas e prezos públicos municipais. As taxas afectadas neste último caso recóllense aquí. A subministración de auga ou a axuda no fogar son algúns dos servizos incluídos.
Por outra banda, os vencementos dos prazos concedidos para atender requirimentos ou solicitudes de información con trascendencia tributaria, para formular alegacións en procedementos de aplicación de tributos e ingresos de dereito público do concello de Ames, de devolución de ingresos indebidos, de rectificación de erros materiais e revogación, que non fosen concluídos a 18 de abril, ampliaranse ata a mesma data, 30 de abril.
Os vencementos dos prazos para atender requirimentos ou solicitudes de información con trascendencia tributaria, para formular alegacións en procedementos de aplicación de tributos e ingresos de dereito público do concello de Ames, de devolución de ingresos indebidos, de rectificación de erros materiais e revogación, comunicados a partir do 18 de abril e respecto de procedementos iniciados con anterioridade a esa data, ampliarase ata o 20 de maio. O vencemento da cota do 5 de abril correspondente aos fraccionamentos e xa concedidos polo concello de Ames, modifícase ao 30 de abril de 2020.
O decreto municipal non é aplicable a aqueles tributos e ingresos de dereito público do Concello cuxa xestión, liquidación e inspección está delegada na Deputación.
Suspensión temporal de cobro
Do mesmo xeito, o Concello notificou onte a suspensión temporal do cobro dos recibos de febreiro e marzo dos servizos de Comedor escolar, Bos días cole e Tardes divertidas. Isto supón que o recibo correspondente ao mes de febreiro non se cobrará mentres non se levante o período de suspensión motivado polo estado de alarma sanitaria (previsiblemente no mes de abril). Así mesmo, o recibo correspondente á parte proporcional do mes de marzo (do 2 ao 13 de marzo) tampouco se pasará ao cobro durante este período.
O decreto íntegro do Concello pode consultarse aquí.