Os “Seráns de Ames” desenvolveranse ao longo de tres xoves do mes de xullo e outros tres xoves do mes de agosto, alternando as propostas entre a praia fluvial de Tapia, a carballeira de Bugallido, e os campos da festa de Ortoño, Covas e Trasmonte.
A iniciativa, que orixinalmente naceu no 2021 como os ‘Seráns de Tapia’ ofrecendo só espectáculos na praia fluvial de Tapia, foi medrando e trasladándose a outras parroquias do rural, apostando por diversificar as propostas culturais de Ames a diferentes localizacións do concello.
Así mesmo, os Seráns de Ames continuarán o xoves 17, tamén ás 20.00 horas, no campo da festa de Covas, unha das parroquias que se estrean neste programa. Nesta xornada haberá dúas propostas, unha delas, será o concerto do grupo de mozos amesáns Teen, cun estilo musical máis instrumental, e a continuación, será a quenda de Ginko Biloba, un grupo formado no 2024 que combina sons máis actuais coma do indie ou electrónica, coa música tradicional.