A concelleira de Voluntariado, Isabel González, destacou que “xa hai 14 anos que comezou a dar os seus primeiros pasos este programa municipal que cada ano foi medrando”
Este pasado domingo, 25 de xuño, as e os participantes puxeron punto e final as actividades que, durante varios meses, desenvolveron dentro do programa de envellecemento activo Amessan. Durante a festa, que se celebrou no Pazo da Peregrina, puidéronse ver expostos algúns dos traballos realizados durante o curso, escoitar aos tres grupos de pandereteiras do programa, así como bailar ao son da música do dúo musical Eva e Camilo.
O programa de envellecemento activo do Concello de Ames, o Amessan, cumpriu este ano a súa décimo cuarta edición, cun récord de participación de máis de 400 persoas. Ao longo de varios meses, habitualmente de outubro a xuño, as e os usuarios poden participar de actividades tan variadas como manualidades, ximnasia terapéutica ou aulas de pandeireta ou de exercitación da memoria.
A concelleira de Voluntariado, Isabel González, destacou que “xa hai 14 anos que comezou a dar os seus primeiros pasos este programa municipal que cada ano foi medrando. Gracias a todos/as os participantes que foron pasando e ás persoas que seguen dende o primeiro día ano tras ano. Gracias tamén a todos/as os profesores/as que pasaron dende o comezo, a Eva e Camilo e gracias o persoal do concello por estar sempre aí, só entre todos/as é posible seguir. Agora a descansar para no mes de outubro volver máis e mellor e intentar corrixir aqueles erros que seguro houbo”.