Ata 300 familias de Ames volveron beneficiarse do segundo reparto anual de alimentos non perecedoiros por parte do Programa Municipal de Alimentos. O reparto fíxose a partir do fondo de axuda europea para persoas desfavorecidas (FEAD) e dirixiuse ás familias con menos recursos do municipio, arredor de 160 no Milladoiro e 130 en Bertamiráns.
Repartíronse conservas de froita, verdura e peixe; pasta e arroz; legumes; leite; bolachas e alimentos infantís. En total, as familas adheridas ao programa reciben tres lotes ao ano destes produtos, en función do número de membros da familia e das súas necesidades -presenza de lactantes, adultos ou menores con problemas alimentarios, etc-.
A concelleira de Benestar Social, Luísa Feijoo, sinalou que a pandemia e o peche de negocios están a incrementar as solicitudes de axudas que recibe o Banco Municipal de Alimentos. “Con este programa intentamos axudar na medida do posible a paliar as dificultades que teñen algunhas familias do noso concello para o acceso a unha alimentación adecuada”, sinalou e edil. Feijoo salientou que os alimentos repartidos buscan garantir tres comidas diarias equilibradas. Ademais destas grandes reparticións hai repartos puntuais semanais, así como reparto de froitas e verduras quincenais e cestas saudables semanais.
Poden solicitar esta axuda as familias empadroadas no concello que non teñan acceso a medios económicos e precisen satisfacer a necesidade básica de alimentación.
.